中環「珍姐海鮮火鍋飯店」出名晚市火鍋氣氛熱鬧，午市碟頭飯好食受歡迎，多月前話因店址太舊而需搬遷，結業後只聞樓梯聲，期間則衍生出只賣三款麵的「Jus」(按此重溫先前分享)，及員工開的灣仔火鍋飯店「豪牛」，到最近終於正式宣佈回歸中環，仲出其不意開喺高檔高場太子大廈。
前天見話正式營業，今日就去幫襯鍾意食嘅碟頭飯，食咗新推出嘅「牛叉燒煎蛋飯」，牛叉燒同「Jus」嘅一樣，自然好食，個燶邊蛋都煎得好靚！背景音樂播住90年代廣東歌，又張學友，又李克勤，又王𠎀，聽住嚟食更正！依家喺中環太子大廈，MTR一出就到，大熱天時去都唔駛出哂汗，地方靚咗又寬敞咗，仲有早餐同下午茶食！
上週五到「紅磡體育館」主場館睇咗「草蜢40週年演唱會」，好似好多人觀後感一樣，除了滿滿的集體回憶外，性價比極高，絕對值回票價！
有朋友話睇「草蜢演唱會」好似去咗Party，所以今次就喺開售時買咗飛去感受下，當時很易上網買到飛，亦沒有什麼「秒殺」，反而要慢慢去飛，首場開始前仍未售罄，只標示少量，到了首場完後出咗口碑，之後六場便售罄了，最後兩場分別有張學友同郭富城做嘉賓，更出現面價數倍的炒價。
「草蜢演唱會」果然名不虛傳，三個多小時冇冷場，氣氛非常好，玩人浪都玩得特別開心，差不多玩足成首歌，整場演唱會係一個很好嘅體驗！
一年多後再到紅館睇演唱會，期間去啟德主場館睇咗三個演唱會，更清楚兩個場地有各自的存在價值，至少喺啟德，買最貴飛都未必睇得清楚個歌手，而今次喺紅館坐山腰，其實已經可以睇得好清楚！
