29 Jul 2025 - [旅遊] 上月還是全球最大的Starbucks！

東京天氣真係好好，藍天無雲！呢間店有三層高上個月仲係全球最大嘅Starbucks，不過剛被台北店超越，但也值得去走走，位處中目黑，地方不算方便，但平日下午也都坐滿人！

28 Jul 2025 - [旅遊] 鎌倉江之島Sea Candle的環廻靚景

從鎌倉江之島地標Sea Candle的環廻靚景，天朗氣清下感覺特別治癒！

26 Jul 2025 - [旅遊] 遇正一年一度的「東京隅田川花火大會」

今次到東京，遇正一年一度嘅「東京隅田川花火大會」，估唔到可以睇到放煙花！

26 Jul 2025 - [旅遊] 參觀「3COINS」原宿旗艦店

「3COINS」香港希慎店喺開張日營業額打破呢間日本公司的歷史新高，今日喺社媒仲見大排長龍！嚟到東京，當然去原宿旗艦店參觀下。雖然可以施施然入內，不過入面都唔少客，俾錢嗰下都要排下隊。啲產品設計算係幾特別幾吸引，今次就買咗個好似前排賣斷市嘅迷你相機仔做個紀念！

26 Jul 2025 - [旅遊] 35度下POP MART戶外長龍

東京氣溫35度，但係原宿間POP MART條龍仲可以長到咁，真係好「熱」情！

24 Jul 2025 - [高息股系列] 本地印刷公司雋思集團(1412)業績及業務分析

最新的信報文章(按此重溫)提到今年股價至今升幅約五成的雋思集團(1412)未來業績可受惠於集換式卡牌市場增長，其實製造卡牌並非這間本地印刷公司公司主要業務。

公司業務主要分為OEM銷售及網站銷售。OEM銷售主要客戶都是行業的領導者，包括Hallmark及Mattel等，不過集中度比較高，跟據2024年全年業績，此部份收入及毛利佔整體分別約81%及58%，毛利率26%，過去三年業績比較反覆，因生意曾受惠於疫情期間對桌遊、卡牌及砌圖等需求大增，前年就疫情後全面復常而倒退，去年則回復增長。 

網站銷售收入及毛利佔整體分別約19%及42%，毛利率高達82%，過去三年業績穩步上揚，客戶比較小而分散，長尾效應抵銷疫情影響，公司透過全面的品牌推廣及市場營銷，包括採取有效的數碼營銷策略、參與貿易展覽會，以及在全球眾籌平台Kickstarter推出項目等，鞏固網站銷售品牌的市場地位。中小企及個人客戶可以透過公司網站如Printerstudio.com、QPMarketNetwork.com等下單製造桌遊、卡牌、袋、砌圖等，可運用提供工具令產品個人化，公司利用集合訂單而令較少量訂單的價錢更具競爭性，亦可建立網店及使用倉儲服務。 

不過，公司去年有64%收入源自美國，不止關稅，小額包裹政策對單量較小的網站銷售影響不少，對今年上半年業績會有所衝擊，除了透過加價外，管理層提到於今年第三季越南廠房改造完成後，會通過越南寄小額包裹到美國。 

雋思集團於2024年全年收入12.1億港元，毛利率65%，純利1.3億港元，和自由現金流入相約，純利率11%。公司財務穩健，去年尾淨現金升至1.9億港元，負債比率6.1%，存貨週轉及貿易應收帳週轉分別處33天及47天的健康水平，股東權益回報率高達14.6%。近年派息比率約60%，去年每股派息$0.14，相對今天收市價$1.55，歷史息率9.0%。

簡志健，持證監會持牌人士，中原資產管理投資總監(CIO)
執筆之時，筆者授權/基金客户沒有持有上述公司

23 Jul 2025 - [旅遊] 意想不到嘅服務

話說剛過去的週日原本安排去澳門睇「林憶蓮演唱會」，早船「金光飛航」過大海，「譽瓏軒」訂枱飲茶，當晚入住「上葡京」，不過一個十號風球只好被迫留港，最麻煩係同四個單位處理退錢，不過總算全部可以Full Refund，只係有啲要等數星期，有啲要等個幾月先收到錢。

當中，酒店Refund有啲阻滯，「上葡京」電郵回覆若直接同佢哋訂房，呢啲不可抗力因素可以全退，但係我透過Trip.com訂房，就要問平台。首先，Trip.com呢啲網上平台當然有所謂AI客服，溝通過預咗幫唔到手，但第一個要讚係Trip.com有熱線電話，仲係唔使撳好多掣，唔駛等好耐就有人聽，佢哋話要問中介Agent，講明幾時回覆，結果真係準時回覆，但係中介Agent話只可改期，不可退款。

我見酒店本身都話會全退，所以堅持退款下，Trip.com電話客服話要再同中介Agent溝通，24小時後再回覆，結果半日後就打電話嚟，話雖然中介Agent仍未答應退款，Trip.com決定自己退款俾我先，我收到電郵便回覆銀行戶口號碼，結果唔使一日就入翻錢俾我，呢啲咁嘅服務態度同水平，真係要俾個讚，同分享俾大家知。以後我幫襯旅遊服務，Trip.com會係首選平台，貴少少都冇所謂！

21 Jul 2025 - [高息股系列] 潮玩產品下的供應鏈公司 (信報「財智博立」專欄)

德林國際(1126)股價自今年6月中旬起急升，今年至7月中股價已上升超過200%。公司一直從事設計及製造塑膠手板模型，曾盛極一時的Funko塑膠公仔為其主要客戶之一，不過Funko(FNKO)業績在2021年至2022年觸頂後便無以為繼，收入倒退更年年虧損。幸好德林國際透過收購進入毛絨玩具市場，Walt Disney(DIS)成為其重要客戶，於香港、上海及東京迪士尼樂園售賣的毛絨玩具不少為德林生產，收入及盈利上皆填補了塑膠手板模型的下滑缺口。

看公司至去年12月全年業績，收入按年升2%，毛利按年跌7%，毛利率由25.1%下滑至23.0%；純利按年跌11%，純利率由15.5%下滑至13.6%，業績不算理想。毛絨玩具收入按年升1%，佔整體51%，溢利按年跌2%，佔整體71%，不過下半年溢利已回復增長，按年升14%。另一方面，塑膠手板模型收入按年升5%，佔整體42%，溢利按年跌22%，佔整體25%。公司勝在財務穩健，去年尾淨現金升至14.6億港元，負債比率只有3.6%，存貨週轉及貿易應收帳週轉分別處72天及57天的健康水平，股東權益回報率高達18.6%。公司過往數年逐步提升派息比率至去年的55%，每股派息$0.60，相對3月尾公布業績前的股價$5.68，當時息率高達10.6%。

公司主要市場仍是北美，2024年收入佔比42%，但比2021年的71%已明顯下降，日本及中國收入佔比分別提升至25%及19%，相信是受惠於兩地迪士尼樂園的毛絨玩具訂單。公司廠房主要在中國及越南，後者規模更大，可以平衡美國關稅風險。股價自6月中旬起急升，投資者或會認為是公司今年業績將大幅受惠泡泡瑪特(9992)的IP潮玩熱潮，不過管理層在3月尾業績會時透露才剛剛得到泡泡瑪特試單，6月則正式成為塑膠玩具新客戶，但訂單佔比仍小，股價近日表現理想，相信和市場資金積極炒作主題，加上放大對未來泡泡瑪特的增單憧憬，事實上相關影響需待8月公布中期業績時才可更清𥇦。不過，留意相對7月中股價$14.34，歷史息率只有4.2%。

除了潮玩IP玩具，集換式卡牌市場也不容忽視，根據中國行業龍頭卡遊的申請港股上市資料，雖然2024年收入比泡泡瑪特少22%，毛利率皆約67%，但純利卻高過泡泡瑪特43%。市值只有7.5億港元的雋思集團(1412)也算身處卡牌供應鏈中，這間印刷公司主要產品為桌遊、賀卡、集換式卡牌等，最新業績提到有見集換式卡牌市場蘊藏巨大潛力，因此會專注優化為集換式卡牌出版商及品牌提供的生產方案，特別是在產品開發、生產技術及營運標準等方面建立的優勢；另外亦成功與全球集換式卡牌及收藏品市場的領先企業及一眾內地集換式卡牌發行商建立業務關係，好像卡遊也是其一客戶。

雋思集團於2024年全年收入12.1億港元，毛利率65%，純利1.3億港元，和自由現金流入相約，純利率11%。公司財務穩健，去年尾淨現金升至1.9億港元，負債比率6.1%，存貨週轉及貿易應收帳週轉分別處33天及47天的健康水平，股東權益回報率高達14.6%。近年派息比率約60%，去年每股派息$0.14，相對7月中股價$1.39，歷史息率10.1%。若果認為公司未來業績可受惠於集換式卡牌市場增長，也可以留意這間供應鏈公司。 

簡志健，持證監會持牌人士，中原資產管理投資總監(CIO)
執筆之時，筆者授權/基金客户持有泡泡瑪特(9992)

20 Jul 2025 - [飲食] 十號風球下留港的晚飯

週日晚本來過大海睇「林憶蓮演唱會」，順道看看澳門最近市道係咪好好，賭場係咪好旺場，因為演唱會經濟而令6月賭收大升，不過一個十號風球只好乖乖留港，諗起演唱會、酒店、餐廳及船票退錢都煩，所以都係去咗一間十號風球都開嘅食肆，食餐好嘅開心下。

不過，呢餐「彤福軒」又真係好好食，叫咗三個主菜「黑虎掌菌山藥和牛臉肉煲」、「金湯藜麥舞茸菇燴菠菜苗」同「雞油菌雞球五常大米煲仔飯」都好有特色，尤其係後者，個飯焦好正！