31 Aug 2025 - [飲食] 初嚐韓劇經常出現嘅「馬格利酒」

三星期前去HansikGoo食米芝蓮韓式大餐，佢哋送咗支韓國米酒「馬格利酒」做禮物，雖然未飲過，但係本身唔嗜酒，本來都冇乜興趣，不過因為睇韓劇經常見到，所以都係攞咗翻屋企等機會試吓，到今晚決定煎塊1++韓牛配合下！今次呢支「馬格利酒」酒精含量7.5%，味道少少甜，其實淺嚐下都算幾好飲！

25 Aug 2025 - [股票投資] Netflix影響力無遠弗屆

Netflix套電影《Kpop獵魔女團》自6月20日上線只有兩個月，佷快便會成為平台史上最高收視英語電影首位，雖然好多人已經睇過，不過剛在週六週日反攻戲院在北美上映限定兩天「歡唱場」，結果收1,800萬美元，贏咗所有對手，Netflix又再創先河，再創紀錄，再次證明其影響力無遠弗屆，現價預期今年及明年市盈率分別是46倍及37倍，高溢價源於公司在全球影視娛樂界的影響力明顯高於其他同業，不斷開拓生意疆土，會員費及廣告費可以越收越多。

我在一個月前已在Netflix看過《Kpop獵魔女團》，其實故事簡單亦是一般套路，但節奏明快，畫功影像很靚，尤其係啲歌，第一次聽已覺得很悅耳，難怪主打歌《Golden》已成為美國Billboard單曲榜冠軍，在YouTube點擊率已超過2.3億。

另外，中國卡通電影《哪吒2》自今初在北美戲院上畫已累收2,000萬，非英語電影已算不錯，剛在過去週末上映英語版，不過週五六日三天票房只有150萬美元。(圖表來源：Box Office Mojo)

24 Aug 2025 - [生活逸事] Dyson PencilVac Fluffycones開箱

前天看到新推出的 Dyson PencilVac Fluffycones介紹，又有早鳥優惠，傍晚到ifc專門店看真身後便買了，昨晚順豐送上門，很有效率！今天開箱，很容易便裝嵌好，喜歡其細部及靈活，更喜歡叉電位小巧兼不需上牆。至於產品及功能一大串，有興趣可以自己上網search，最重要還是啱我用！

23 Aug 2025 - [娛樂]「GEM香港演唱會」看後感

週三到「啟德體育園」主場館看了「GEM香港演唱會」

- 睇演唱會咁多次，都係第一次睇尾場！

- 最貴票坐第十多行離舞台中央十多個座位，位置已比上次睇「五月天」好些，但望到舞台上的歌手仍不大，這就是「啟德體育園」和「紅磡體育館」的分別，場地實在太大。

- 其實我並非GEM歌迷，平時亦冇乜聽佢啲歌，但係佢八年前佢喺香港開紅館演唱會都有睇，因為入場都係想睇高水準演出。

- 見到仍有不少人仲討論GEM算唔算香港歌手，其實都無聊，為何不專注欣賞表演。明白每個人都有自己嘅準則，但是若果準則可以隨環境轉變，便不是準則。今次GEM全程廣東話，連影片旁白也重錄廣東話，已誠意十足。

- 見到有些人話佢只懂叫住唱歌，其實每個歌手唱歌都有佢嘅特色演繹手法，不過只要聽佢清唱Amazing Grace，同彈住琴唱Gloria，就知佢唱歌有幾好聽，有幾高水準，可以講係一種享受！

- 睇完今次演唱會，先知佢自己嘅歌很大部份都係自己包辦作曲填詞，佢對音樂及演出嘅專注、鑽研同熱誠，應該係佢成功嘅原因。

- 這次無論唱功及製作都係高水準，已經有很多的客觀評價認同，加上現場氣氛高漲，係一個很好嘅體驗，絕對值回票價！

21 Aug 2025 - [飲食] 酒樓晚市一片死寂？

很多年未去過旺角嘅「倫敦大酒樓」，尤其係食晚飯！

- 現在門口招牌還寫上日文。

- 原來晚市也有點心，點心紙的點心都有日文翻譯。

- 今晚冇食點心，食咗傳統廣東菜蝦多士、炸蟹鉗、柚皮等，估唔到都幾好食，值得去試。

- 酒樓有兩層，今晚去四樓，都有十枱八枱客，平日已算不錯，尤其係剛喺傳媒見到一篇「酒樓晚市一片死寂」嘅報導。

- 雖說話開到10:00，但係過咗9:00要截數埋單，9:30要離場，早收已經係不少香港食肆嘅現象。

19 Aug 2025 - [股票投資] Labubu在泡泡瑪特的最新收入佔比

根據泡泡瑪特(9992)剛公布今年上半年業績，The Monsters(主要是 Labubu)的收入按年升6.7倍，金額已等同於接著四名Molly、Skullpanda、Crybaby及Dimoo的總和。

還記得Labubu爆紅前，公司收入一直是Molly、Skullpanda及Dimoo三分天下！

18 Aug 2025 [股票投資] 你最近有冇用少咗Google Search？

今天香港經濟日報有篇報導，提到「零點擊搜尋 (Zero-Click）」現象：「搜尋引擎」的定義正被AI默默改寫，各大搜尋引擎開始從傳統連結導向轉向智能總結與生成式回應，讓用家無需點擊任何連結就能獲取資訊，不再是「去哪裏找答案」，是「直接拿到答案」。而這種現象就被稱為「零點擊搜尋」，也慢慢促成「流量大斷崖」的問題出現，當中亦不乏影響媒體行業。

其實，我亦已經成為「零點擊搜尋」一族的成員，現在上網搜尋大多在Perplexity 進行，很少用Google，相信成員未來會越來越多，只是使用的AI工具不同，相信Google在搜尋市場的超高市佔率會被逐步蠶食。雖然，現在於Google搜尋，會透過「AI Overview」直接出現答案，以和其他AI工具競爭，但有咗答案仲會唔會按其他包括俾錢買Search Ad嘅連結？Google最近話反而多咗，不過大家會唔會咁做？若果Search Ad未來被按少咗，Google嘅最主要收入來源會受影響！Alphabet(GOOG)估值比以往低，是否正反映此現象？

18 Aug 2025 - [高息股系列] 行業內捲下的津上機床中國 (信報「財智博立」專欄)

津上機床中國(1651)先前公佈至今年3月全年業績，收入按年上升37%，毛利按年上升57%，毛利率由上一年度的28.7%提升至33.1%，主要得益於公司實施的大量降本增效的改善措施。國內機床行業競爭愈演愈烈，價格戰已成為市場競爭日常，公司近年來通過全體員工參與的改善提案活動，在公司運營的所有環節大力推進減低成本提高效率，令公司在有需要時能夠審時度勢主動降低產品售價，在市場競爭中取得優勢外，自身盈利能力也得到明顯提升。 

公司全年純利按年上升63%，純利率由上一年度的15.4%提升至18.4%。無論收入及盈利，下半年的按年升幅皆比上半年快。每股盈利按年上升63%，不過每股派息只按年上升19%，派息比率由上一年度的58%降至43%。管理層曾提及每股派息不會比上一年度少，不過於業績大幅提升下，派息比率反而下跌，相信是股價於6月下旬公布業績後積弱近一個月的原因之一。另外，市場或擔心收入及盈利大幅上升下，全年度營運活動現金流入卻按年下跌30%至3.5億元人民幣，明顯低於7.8億元人民幣的純利，而自由現金流亦按年下跌26%。不過，公司財務狀況仍非常健康，存貨週轉由157天下跌至114天，現金循環週期由94天下跌至65天。今年3月尾的淨現金維持在11億元人民幣水平，負債比率保持低企的0.1%，基本上和無負債沒分別，令高達25%的股東權益回報率更具說服力。 

公司業務分為四類，包括精密車床、精密加工中心、精密磨床及銷售其他組件，看最新年度，精密車床收入佔整體高達85%，收入按年上升37%，和整體相同。公司產品主要應用在汽車零部件、移動電話和通訊設施等IT電子零部件、工業自動化用零部件、醫療器械、工程機械等行業以及AI液冷和人型機器人等新興領域，並根據客戶需求進行部分訂製或優化設計。留意公司產品需求有週期性，為業務主要風險，2023年業績便受到下行週期影響而倒退，不過自2024年起逐步重返上升週期，現正受惠於汽車行業技術的升級轉型，以及AI和人形機器人的急速發展對小型精密零部件的製造需求。 

津上機床中國的母公司為日本津上Tsugami Corp (6101.T)，後者佔股權65%，和母公司的分工在於主力負責中國業務，最新年度收入中89%源自中國。另一方面，日本津上負責TSUGAMI品牌的全球戰略布局，包括製造技術標準設定、核心技術開發、品牌形象和品質管理。津上機床中國也向日本津上採購關鍵零部件、技術及使用商標，產品在浙江工廠生產，近年積極擴建產能和優化本地化研發，而日本津上同時為津上機床中國的客戶和供應商。 

簡志健，持證監會持牌人士，中原資產管理投資總監(CIO)
執筆之時，筆者授權/基金客户持有津上機床中國(1651)

17 Aug 2025 - [娛樂] 睇《Chiikawa》了解Chiikawa文化

終於睇完黃viu上嘅240集《Chiikawa》，每集1分鐘，輕輕鬆鬆又一集，忙碌的工作期間，休息時用嚟kill time，其實係一個唔錯嘅選擇！

作者藉生活日常同簡單故事帶出每角角色的性格及關係，睇完後，我會理解Chiikawa熱潮為何出現，及為何三個主角Chiikawa、小八同兔仔Usagi會各有支持者。還記得數月前在海港城Chiikawa產品銷售時，因想杜絕炒家，消費者要答啱Chiikawa相關問題先可以買貨，我諗依家對我已經唔係問題。

12 Aug 2025 - [生活逸事] 差不多兩年才來一次深圳遊

因事和老婆到深圳走了一趟，原來上次到訪已是2023年11月，差不多兩年才去一次深圳，可見我對北上消費的興趣至少暫時不大！完成差事後，臨返港前習慣性去一次羅湖「萬象城」，原來這個有超過廿年歷史的標誌性商場擴建了二、三期，結果估不到流連了四個小時，先到兩年前曾光顧並印象深刻的tea’stone嘆茶，今次還買了些茶返港飲用，不少面積的店舖平日下午4:00全滿，值得推薦。接著行逛商場新地方，老婆在New Balance Grey買了在港缺貨的新款波鞋，接著又習慣性去「江南廚子」晚飯，食了喜愛的東坡肉。

記得「老舖黃金」兩年前在此商場有一間店一個Counter，今次則見有兩間店一個Counter，另外除了周大福、周生生及六福外，也見到有兩間店專賣古法黃金工藝品，一間叫「Jemper君佩」，一間叫「Borland寶蘭」，查過都有點歷史，但知名度不高，拓展零售業務，似乎想和「老舖黃金」分一杯羹，但只有「老舖黃金」兩店內皆堆滿人。不過，「Borland寶蘭」似乎實力不差，喺花絲鑲嵌工藝領域歷史悠久，為具備國內首家符合行業標準的品牌。

10 Aug 2025 - [飲食] 充滿傳統韓菜特色的米芝蓮餐廳「Hansik Goo」

因「黑白大廚」而更出名的評審安成宰三年前喺香港開「Mosu」，挾著南韓米芝蓮三星餐廳喺香港開分店之盛名，當時雖未有「黑白大廚」，但係已經極難訂位，不過我鍥而不捨下有幸食到，無論食物、服務、環境等旨具質素，不過唯一印象深刻係牛肉明顯有根打咗折扣，但估唔到過咗三年香港米芝蓮連一星都唔俾佢！

因此，過往數年唯一食南韓菜餐廳而喺香港米芝蓮攞星的仍然只有另一個南韓米芝蓮三星「Mingles」大廚開嘅「Hansik Goo」，今次同老婆慶祝生日終於品嚐到，以上疑團終於解開咗唔少，我認為「Hansik Goo」係更值得去食嘅一間，佢有一星，咁「Mosu」冇星亦非不合理。

因為已經食過不少西式Fine Dining，難有驚喜，「Mosu」成件事太似去食法式Fine Dining，就算今年復活節喺首爾到米芝蓮兩星餐廳「Jungsik」品嚐後嘅感覺都差不多，就係又食咗一餐Fine Dining，韓國因素唔算明顯，但係「Hansik Goo」份Menu就好有傳統韓菜特色，令我覺得食Fine Dining有翻新鮮感，加上每位$1,888(未配酒)呢個價錢，食物仲非常豐富，喺不少米芝蓮餐廳逐步加到每位三四千元下，感到性價比特別高。就算今次Add-on三件韓式炸雞，配特色柚子甜醬，都只係$138。留意店員話餐廳最受歡迎嘅菜式，原來係用料包括鮑魚、海蔘、鰻魚等的韓式牛肉湯。

今次係繼TATE Dining Room後，近年會mark低未來會再encore的Fine Dining，同埋會推介大家去試！