5 Dec 2025 - [飲食] 茅台紫菜北海道左口魚群邊煲仔飯

今日再去「鋒膳」旗下灣仔「美麗小廚」食飯，走時下午6:00已排長龍，啲位未坐滿但應該俾人訂咗，開張數個月已口碑載道，幸好我同老婆於下午5:15已入座！

呢度出名煲仔飯，上次試過都覺得好正，不過有太多款式，很易有選擇困難症，侍應阿姐建議時令左口魚煲仔飯，似乎幾有特色，老婆話最近興食左口魚，咁OK落單，多口問句幾錢，原來承惠$400，都打咗個突！之後張單嚟咗，先知全名係「茅台紫菜北海道左口魚群邊煲仔飯」。

20分鐘後上菜，咁又真係好好食，左口魚群邊入口即化，整煲飯配搭很好，飯有魚油香及酒香，飯焦亦如上次般脆度適中，真係又要俾Like「美麗小廚」。之後上網查翻，原來煲飯做法係「左口魚裙邊會先用茅台酒去除腥味，然後舖在半熟的飯及頭水紫菜上，左口魚經過慢火燜焗，再用火槍現場炙燒表面，最後更噴灑大量茅台酒」。

大家可能喺日本料理聽過或食過左口魚裙邊，其實佢係「左口魚最肥美、油分最豐富的部位，位於魚身背鰭和臀鰭之間，以其入口即溶、肉質細嫩、味道甘香而聞名，常被做成刺身或炙燒食用，是日本料理中極受歡迎的珍品」。

7 Oct 2025 - [飲食] 絕對值得推介的「鋒膳」大排檔

灣仔石水渠街有間港式中菜上樓食肆「鋒膳」，一直很受歡迎，午市嘅焗豬扒飯同叉燒煎蛋飯都好食，晚市套餐千多二千元，上網看還見會滿座。期後喺上環開主打川菜嘅「井巷子」，我每次去反而係食燒味，叉燒同燒肉都係高質，一試難忘。先前「井巷子」結業，更直接將燒味部拆出在灣仔蘭杜街開「發達叉燒」，很快打響名堂，至今仍是長龍店，上週六下午5:30去攞外賣，又見排長龍，除咗叉燒，茅台醬油雞都出名，可惜未見賣燒肉！

前天發現「鋒膳」又有新食肆，兩三星期前在灣仔譚臣道聯同「麗姐廚房」開主打大排檔小炒嘅「美麗小廚」，昨晚在灣仔藍屋附近感受中秋氣氛前，當然順道去試試，果然沒有令我失望，白鱔煲仔飯非常好食，飯焦唔黐底仲鬆脆，啲鱔仲切到冇骨；鮮果咕嚕肉啲肉外脆內軟，菠蘿又新鮮；啫啫芥蘭煲好香口，芥蘭起心炒。

呢間食肆一定要encore，絕對值得推介。不過前天想訂位，要至少六人再可以，但有少量walk-in位，下午5:00開晚市，所以同老婆5:30便到，聽經理講全晚訂座已滿。呢度都有午市，但係另一菜單，以碟頭飯為主，詳情可參考「鋒膳」官方網站(按此)。