今日再去「鋒膳」旗下灣仔「美麗小廚」食飯，走時下午6:00已排長龍，啲位未坐滿但應該俾人訂咗，開張數個月已口碑載道，幸好我同老婆於下午5:15已入座！
呢度出名煲仔飯，上次試過都覺得好正，不過有太多款式，很易有選擇困難症，侍應阿姐建議時令左口魚煲仔飯，似乎幾有特色，老婆話最近興食左口魚，咁OK落單，多口問句幾錢，原來承惠$400，都打咗個突！之後張單嚟咗，先知全名係「茅台紫菜北海道左口魚群邊煲仔飯」。
20分鐘後上菜，咁又真係好好食，左口魚群邊入口即化，整煲飯配搭很好，飯有魚油香及酒香，飯焦亦如上次般脆度適中，真係又要俾Like「美麗小廚」。之後上網查翻，原來煲飯做法係「左口魚裙邊會先用茅台酒去除腥味，然後舖在半熟的飯及頭水紫菜上，左口魚經過慢火燜焗，再用火槍現場炙燒表面，最後更噴灑大量茅台酒」。
大家可能喺日本料理聽過或食過左口魚裙邊，其實佢係「左口魚最肥美、油分最豐富的部位，位於魚身背鰭和臀鰭之間，以其入口即溶、肉質細嫩、味道甘香而聞名，常被做成刺身或炙燒食用，是日本料理中極受歡迎的珍品」。
