28 Dec 2006 - 恭喜恒指衝破20,000點！值得大家參詳的「陸氏語錄」

(現在大家可登入 www.redmonkey.hk 便可瀏覽「紅猴股評」)

2006年1至11月瀏覽人次：90,000

恒指日日大升，收市破20,000點，都好有「大時代」Feel！

昨天香港網絡癱瘓，Google、Yahoo、MSN等全上不到，本以為要下年才可再寫股評，估不到這麼快便修復了，雖然慢一點，但已算不錯！

上一篇股評提到大牛市時股票估值的瘋狂，以古鑑今，說中國人壽(2628)見$40毫不出奇；假期後兩個交易日繼續顯示此「瘋狂」的威力！

投資組合方面，昨天開市以$7.56買入中國糧油(506)，收市跌至$7.36，今天又大升上$7.98，此股預期PE只20，注資重組後整固一段時間，似再開車，於此大牛市，PE20屬等閒，筆者亦嘗試放開懷抱加强想像力，以免錯失機會；但大前提是筆者低位已入了很多貨，現高價搶貨，以整個組合計風險相對不高；但若現在無貨又高價搶貨，風險很大，閣下自負，惟告誡「切記止賺止蝕」。

另外，筆者昨天開市亦以$3.73買入中國電信(728)；今天大快活(52)跌破$9.4，按計劃以$9.38沽出最近入貨的4,000股，盈利$5,880，保留5,000股；筆者錯估飛毛腿(1399)，見好些上兩週上市的半新股失卻支持，還是走為上着，今天分別以$2.73及$2.7各沽出2,000股，打和離場；筆者於上一篇股評的投資組合已没有愛高集團(328)，因上週五已止蝕以$3.77沽出，抱歉上篇忘記錄下，此股現報$3.4，可見止蝕之重要性。筆者覺得投資者正抽走某些股票的資金以投入中國股票大洪流！

(按一下下圖可放大)



瑞銀投資研究部董事總經理陸東一直測市很準，筆者於11月5日的股評亦曾提及；此君於某週刋的訪問剛登出，發人深省，筆者特意節錄他的評論，值得大家參詳；其實筆者之投資理念與他相近，但功力自然還差很遠！
-------------------------------------------
「我成日強調，個市調整唔出奇，但你唔好話：『咦，Andrew Look(陸之洋名)係大好友，跌三百點喎，打去潤吓佢先。』幾百點對於一個接近兩萬點嘅市場，係咩啫？」

「你入行夠七年未？有無見過牛市先？」(他認為很多人未親身經歷牛市，對現在的升市大驚小怪！)

「我成日聽到人話萬五點升到萬八點，嘩，好高啊！會跌啊！喂，大哥你有無睇個earning(盈利)升幾多先，你淨係睇個P(price)唔睇個E(earning)，呢啲好明顯就係唔夠經驗。」

分析員首要獨立思考，擇善固執，最忌左搖右擺，否則「同街邊阿嬸無分別」。他對那些一星期講足七日的股評人，可謂「心悅誠服」。「我諗我無呢個技能囉！你問我聽日個市高開定低開，sorry，我真係答唔到你。有記者打嚟問我，我叫佢搵嗰啲『專家』。」

他認為分析股市，其實並不複雜，只是市場環境雜音太多，「我間房行去股票機要五分鐘，枱頭電腦都check唔到即時股價。你依家問我長實幾錢，我都唔知。」投資者過分在意股價的短線波幅，有時反會忽略了股票的價值。

「據我哋統計，一百個人炒股票，八十一個輸。點解機會唔係五十五十？係因為peer pressure。人有群體習性，要從互相認同中得到安慰，結果必然係過度樂觀或者過度悲觀。」

「過去幾十年，出色嘅基金經理同分析員，都係掗掗拃拃：『你唔好同我講咁多，唔好開咁多會。』因為開會要compromise，初頭話買5%，傾到驚驚哋不如買3%，再講不如唔去買啦，咁點做嘢？」

他堅信，世界上只有一種投資方法可行，就是價值投資。只有盈利才可推動股價，那些所謂的技術分析，背後假設太多。「點解股價拋離二百五十天平均線會掉頭啫？上帝報夢話你知呀？」

股市現於高位牛皮，陸東堅信牛市並未終結：「恒指市盈率未夠廿倍，點算貴？未來六個月，我真係睇唔到有咩原因港股會大跌。」

據他觀察，現時離九七和○○年全民皆股的瘋狂日子甚遠，「你喺油尖旺求其執十個阿婆阿嬸問，佢都叫你小心跌市，咁點叫過分樂觀啊？」

惟他同意，中資金融股如保險股、銀行股，估值實在偏貴。作為一個想「食得安、瞓得着」的價值投資者，便不應選擇。
-------------------------------------------
未來半年大市點睇，收到未？另外，他點名推介太古(19)。

(Contact: redmonkey@redmonkey.hk)

免責聲明：本網頁屬個人網誌，一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無涉。(投資涉及風險，證券價格可升可跌)